Filime y’uruhererekane Nyarwanda yitwa ‘Ikarita y’urupfu’ ifite isomo ry’igisha sosiyete Nyarwanda ko umuco w’ubuhemu atari uwabo kuko hari igihe akebo kajya iwamugarura.
Iyi filime y’uruhererekane ifite inkuru ivuga ku mugabo washatse umugore afite undi mwana ahageze umugore abyara undi mwana utari uwu kuri wa mugabo bashakanye.
Nyuma uwo mugabo wari umukire yaje kwitaba Imana ariko asiga yararaze imitungo ye ku mwana wa mbere. Nyuma yo gupfa hatangiye intambara muri uwo muryango hagati y’abana na nyine washakaga kwigarurira iyo mitungo yose.
Iyi filime yanditswe inayoborwa n’umusore witwa Cobby. Ushinzwe kuyimenyekanisha ariwe Mugwaneza Abdul avuga ko inkuru yayo ahanini igamije kwigisha Abanyarwanda ibintu byo kureka ubuhemu. Ati ” Yiganjemo ubuhemu bubera mu miryango, mbese ni ukwerekana ko nta muntu ugomba kubaho ahemuka kuko kubaho ni ukubana.”
Uyu mugabo watangiye Sinema mu mwaka wa 2012 yanyuze muri filime zitandukanye harimo nka “Amarira y’urukundo, Inzozi mbi, Isi ntisakaye” n’izindi.
Avuga ko byabanje kugorana kugirango abone aho amenera ibi byatumye acika intege yiyemeza kubihagarika ajya gushakira ahandi ariko ashaka igishoro kugirango azikorere filime ze.
Iyi filime y’uruhererekane amaze gukora uduce twayo dutandatu, gusa ntihabura imbogamizi bahura nazo.
Ati “Naje kubona bigorana mba mbihagaritse nshakisha uburyo bwo gukora izanjye. Imbogamizi duhura nazo, hari igihe ubura umukinnyi wujuje ibyo ukeneye cyangwa ntibubahirize igihe. Gusa ikibazo cyose uhura nacyo kigusigira isomo.”
“Hari ibyo uba wumva wakora ariko ntibikorwe neza bitewe naho tugeze mu iterambere mu bijyanye n’imitunganyirize ya filime.”
Avuga ko uyu munsi sinema abantu bayikora aba ari ni ubwitange n’urukundo kuko bisaba kubanza gushora ubundi ukaguma mu cyizere cy’uko hari igihe bizagenda neza.
Iyi filime igaragaramo bamwe mu bakinnyi bamenyerewe muri sinema Nyarwanda nka “Nyirankotsa, Scott, Kevine Dangote, Sharon uzwi mu Indaya y’umutima,Rachel uzwi muri my father in law, Sandrine wakinnye muyitwa Urukundo rw’inzitane n’abandi.
Mugwaneza Abdul niwe wateguye iyi filime
Nyirankotsa ni umwe mu bamaze kubaka izina muri Sinema Nyarwanda
Scott nawe ni umwe mu bagaragara muri iyi filime
Kevine Dangote ni umwe mu bakina muri iyi filime
Cobby niwe wayoboye agira n’uruhare mu kwandika iyi filime.
Sharon nawe agaragara muri film zitandukanye nka indaya y’umutima.
Rachel yakinnye muri filime zitandukanye harimo nka My father in law.
Sandrine nawe yanyuze muri filime zitandukanye harimo iyitwa Urukundo rw’inzitane.