Abakinnyi bamenyerewe muri Sinema Nyarwanda barimo Shaffy, Sharon n’abandi bahuriye muri filime nshya y’uruhererekane bise The Dream.
Iyi filime y’uruhererekane yiganjemo urukundo rwinshi aho umukobwa aba akunda umusore cyane ariko umusore we bitamurimo kugeza ubwo amusimbuje undi mukobwa akajya no kubana nawe ariko ntibimuce intege agakomeza kwiruka ku musore yakunze ubuzima bwe bwose.
Muri iyi nkuru umukobwa akorerwa ibikorwa byinshi bibi akababazwa nuwo musore kugirango amuveho ariko nawe akamubera ibamba.
Ushinzwe kumenyekanisha iyi filime ariwe Mugwaneza Abdul avuga ko inkuru yayo ahanini igamije kwigisha Abanyarwanda gusobanukirwa n’urukundo nyakuri ngo kuko usanga hari abantu benshi birengagiza ababakunda bakiruka inyuma y’abatabashaka.
Ati ” Uyu munsi ntabwo abantu bakizerera mu rukundo, usigaye usanga bamwe bakunda kubera amafaranga abandi bakabijyamo ku zindi mpamvu z’ubuzima. Aha rero twagirango dutange ubutumwa bwerekana ko urukundo hari abarufite kandi banarwizereramo nta z’indi nyungu bakurikiye.”
Iyi filime igaragaramo amasura amaze kumenyerwa muri Sinema Nyarwanda harimo nka Rukundo Shaffy uri no mu bagize uruhare runini mu gishora imari kugirango ibashe kujya hanze.
Yanditswe kandi n’uwitwa Anonymous nawe wayoboye filime zagiye zikundwa cyane harimo nk’iyitwa ‘Umwanzuro’ yatambukaga kuri Televiziyo Rwanda.
Iyi filime izajya itambuka inyuze ku muyoboro wa Youtube witwa ‘Kigali Drama’ bazajya basohora agace buri cyumweru ku munsi wo kuwa gatatu.
Shaffy ni umwe mugaragara muri iyi filime
Abdul avuga ko iyi filime yiganjemo amasomo menshi yo mu rukundo
Sharon ni umwe mu bakinnyi b’imena muri iyi filime
Mushambokazi uzwi nka Sabine agaragara muri iyi filime
Danny nawe ni umukinnyi ugaragara muri iyi filime