Impuzamashyirahamwe y’Umupira w’Amaguru ku Isi yambuye amanota atatu ikipe y’igihugu ya Afurika y’Epfo mu mikino yo gushaka itike y’Igikombe cy’Isi 2026 kubera gukinisha umukinnyi utabyemerewe, bisubiza ibihekane mu mibare y’itsinda ihuriyemo n’Amavubi.
Ibi byabaye nyuma y’uko Afurika y’Epfo ikinishije umukinnyi Teboho Mokoena mu mukino batsinzemo Lesotho ibitego 2-0 tariki 21 Werurwe 2025 nyamara yari afite amakarita atamwemerera gukina uwo mukino.
FIFA yamenyesheje Ishyirahamwe ry’Umupira w’Amaguru muri Afurika y’Epfo ibihano yarifatiye birimo no gukurwaho amanota atatu ndetse hakanatanga amande angana n’ibihumbi 12,500 by’amadolari, byose kubera kwica ingingo ya 19 y’amategeko ngengamyitwarire ya FIFA ndetse n’iya 14 y’amategeko agenga iyi mikino yo gushaka itike y’Igikombe cy’Isi.
Gukurwaho amanota kwa Afurika y’Epfo byatumye ihita itakaza umwanya wa mbere yariho n’amanota 17 mu itsinda rya gatatu ifata uwa kabiri n’amanota 14 mu gihe uwa mbere yawusimbuweho na Benin yitegura kwakirwa n’Amavubi tariki 10 Ukwakira 2025.
Amavubi aheruka gutsinda Zimbabwe ari ku mwanya wa kane n’amanota 11 gusa anganya na Nigeria ya gatatu ariko batandukanywa n’ibitego bibiri Nigeria izigamye mu gihe Lesotho ifite amanota icyenda ku mwanya wa gatanu, Zimbabwe ikagira ane ku mwanya wa nyuma ari wo wa gatandatu.