Nicole Kidman na Keith Urban batandukanye nyuma y’imyaka 20

Umukinnyi wa filimi akanazitunganya, Nicole Kidman ndetse n’umuririmbyi mu njyana ya Country Music, Keith Urban; batandukanye nyuma y’imyaka 20 yari ishize barushinze, bitungura abakunzi babo ari na ko bibashengura.

TMZ yatangaje ko amakuru yabonye ari uko aba bombi kuva mu ntangiro z’impeshyi ya 2025, batabanaga kuko buri wese yari yarahisemo kuba ukwe.

Iki kinyamakuru gikomeza kivuga ko Nicole Kidman ari we uri kwita ku bana babiri yabyaranye na Keith Urban, barimo Sunday Rose Kidman Urban w’imyaka 17 na Faith Margaret Kidman Urban ufite imyaka 14; cyane ko umugabo yamaze kumuta.

Amakuru avuga ko uyu mugore w’imyaka 58 yagiye agerageza gukora ibishoboka byose ngo urugo rwe ntirusenyuke, ariko bikomeza kugorana kugeza aho umugabo yahisemo kugenda akajya mu nyubako yaguze mu Mujyi wa Nashville n’ubundi bari batuyemo. Ntabwo ibijyanye no kwaka gatanya biramenyekana.

Ibyabo byatangiye kwibazwaho muri Kamena 2025, ubwo Keith Urban yari ari mu kiganiro kuri Zoom yabazwa ku cyo yavuga ku kuntu Nicole Kidman yagaragaye muri filime ya Netflix yitwa ‘A Family Affair’ yahuje urugwiro na Zac Efron, undi ahitamo guhita ava ku murongo ntacyo asubije.

Aba bombi barushinze mu 2006. Kidman yari yarabanje kurushinga na Tom Cruise mu 1990 bagatandukana mu 2001. Nawe bafitanye abana babiri barimo Bella Kidman Cruise w’imyaka 32 na Connor Cruise ufite imyaka 30.

Leave a Reply

Your email address will not be published. Required fields are marked *