Umuhanzi Butera Knowless n’umugabo we Ishimwe Clement bakiriye inka bagabiwe na Perezida Paul Kagame ku munsi bizihiza imyaka umunani ishize aba bombi bashinze urugo.
Taliki ya 17/7/2024 nibwo Perezida Paul Kagame na Madamu we bakiriye abahanzi batuye mu Karumuna mu rwuri rwe ruri i Kibugabuga.
Bakiriye abahanzi batandukanye barimo na Knowless waherukaga kubimusaba nawe akamwemerera ko azabatumira akanabagabira.
Kuri uyu munsi nibwo berekanye ko bamaze kwakira izo nka bagabiwe.
Ishimwe Clement abinyujije ku rubuga rwa instagram yashimye umukuru w’igihugu abihuza n’iyi taliki idasanzwe kuri bo.
Yagize ati “Mbega uburyo bwiza bwo kwishimira imyaka umunani ishize dukoze ubukwe{…} Uyu munsi twakiriye Rugirabuntu na Rudahinyuka twagabiwe na Rudasumbwa. Tuzabihorana iteka.”
Muri ayo mafoto bari barikumwe n’abandi bahanzi barimo Platini, Nel Ngabo, Meddy Saleh ukora amashusho y’abahanzi.
Kuri iyi taliki mu mwaka wa 2016 nibwo Knowless na Clement basezeranye. Ubukwe bwabo bwabereye mu busitani bwa Golden Tulip Hotel i Nyamata.
