Umuhanzi akaba na Producer Element Eleeh yaciye amazimwe ku bibazaga ko amajwi ye atazagaragara mu ndirimbo yahuriyemo na The Ben hamwe na Kevin Kade.
Mu minsi ishize nibwo aba bahanzi basohoye ifoto yamamaza indirimbo yabo bise ‘Sikosa’ aho bavugaga ko igiye kujya hanze.
Itarasohoka hahise hatangira kuba intambara y’amagambo bivugwa ko yakuwemo ku bwubwikane buke bwavutse hagati ye na 1:55 AM imureberera inyungu.
Ibi byahise biteza urusaku mu ruganda rw’imyidagaduro bavuga ko iyi Label imufasha yabangamiye uyu muhanzi.
Uyu musore yasubije abibazaga ibyabaye yifashishije urubuga rwa X, aho yanditse agira ati “Ukuri ni uku, Tiger (The Ben) ni mukuru wanjye akaba n’umunyabigwi. Buri gihe byahoraga ari inzozi zanjye gukorana nawe. Nta muntu ungomba ikintu na kimwe, indirimbo rero igomba gusohoka vuba bishoboka.”
Amakuru yavugaga ko Element yari afite amahitamo abiri yo kwishyura amafaranga y’umurengera akaguma mu ndirimbo cyangwa se agahitamo kuyigumamo akava muri iyi nzu bakorana.
