Umuhanzikazi w’umunyarwanda uri mu bagezweho muri iyi minsi Boukuru ahatanye mu bihembo bya Prix Decouvertes bitangwa n’igitangazamakuru cy’Abafaransa cya RFI.
Uwase Bukuru Christiane ukoresha amazina ya Boukuru mu muziki ahatanye n’abandi bahanzi barimo Dina M wo muri Madagascar, Suintement na Jenny Paria bo muri RDC, Grégory Laforest wo muri Haïti, Sahad wa Sénégal, Straiker na Queen Rima bo muri Guinée, Yewhe Yeton wo muri Bénin na Joyce Babatunde wo muri Cameroun.
Abatoranyije aba bahanzi barimo inzobere mu muziki za Radiyo Mpuzamahanga y’Abafaransa, ’RFI’ itegura ibi bihembo hamwe n’abanyamakuru n’abahanzi batandukanye.
Bahereye ku mwihariko cyangwa umwimerere w’ubuhanzi bw’abahatana, ubuhanga bwabo mu kuririmba imbonankubone, uko bazwi hanze y’igihugu cyabo ndetse n’uburyo bashobora kwiyegereza abafana.
Uzegukana Prix Découvertes RFI 2025 azatangazwa ku wa 18 Gashyantare 2025 kuri RFI, nyuma y’ibyemezo by’akanama nkemurampaka kazaba kayobowe n’umuririmbyi w’Umunya-Bénin Angélique Kidjo.
Burabyo Yvan [Buravan] witabye Imana mu 2022, ni we Munyarwanda uheruka kwegukana iki gihembo Boukuru ahatanyemo. Icyo gihe yegukanye igihembo cya Prix Découvertes RFI 2018.
Umuhanzi wegukanye iki gihembo ahabwa amayero ibihumbi icumi[arenga miliyoni 14 Frw] ndetse no gufashwa gukora ibitaramo bizenguruka Afurika na kimwe gikomeye uyu muhanzi ategurirwa i Burayi.
