Umuhanzikazi Bwiza na Dj Toxxyk bamaze gutangazwa nk’ibyamamare byo mu Rwanda bizahurira mu gitaramo kimwe n’umunyamerika John Legend.
Igitaramo cya Move Afrika giteganyijwe kubera muri BK Arena, tariki 21 Gashyantare 2025. Ni ku nshuro ya kabiri iki gitaramo gitegurwa n’Umuryango Global Citizen, kigiye kubera mu Rwanda.
Bwiza azahurira muri iki gitaramo n’umuhanzi w’icyamamare mu Njyana ya R&B, John Legend.
Igitaramo cya “Move Afrika” gitegurwa binyuze mu mushinga ‘Move Afrika: A Global Citizen Experience’, utegurwa n’Umuryango Global Citizen ku bufatanye n’Ikigo cy’Inararibonye mu guhanga udushya, pgLang cyashinzwe n’Umuraperi Kendrick Lamar.
Ku nshuro ya mbere iki gitaramo cyabereye mu Rwanda ku wa 6 Ukuboza 2023, icyo gihe cyatumiwemo Kendrick Lamar.
Ibi bitaramo biteganyijwe ko bizabera mu Rwanda no muri Nigeria. Ku ikubitiro, igitaramo cya mbere cya Move Afrika 2025 kizabera muri BK Arena ku wa 21 Gashyantare 2025 mbere yo gukomereza mu Mujyi wa Lagos muri Nigeria ku wa 25 Gashyantare 2025.
Move Afrika itegurwa hagamijwe gukemura ubusumbane mu bukungu bw’Isi no gushyiraho amahirwe afasha abakiri bato muri Afurika kubona imirimo binyuze mu ruhererekane rw’ibitaramo no guteza imbere inganda ndangamuco.
John Legend yavuze ko Afurika yahoze ari icumbi ry’umuziki mpuzamahanga kandi bimuteye ishema kuzataramira kuri uyu Mugabane.
Ati “Nanyuzwe ndetse nishimiye kuzataramira muri Kigali na Lagos mu ruhererekane rw’ibitaramo bizenguruka Afurika, Move Afrika tour.’’
John Roger Stephens yamamaye cyane mu ndirimbo zirimo “All of Me” imaze kurebwa n’abasaga miliyari 2,4 kuri YouTube.
