Umuririmbyi Justin Timberlake yatawe muri yombi i New York ashinjwa gutwara imodoka yasinze, nk’uko abategetsi baho babibwiye BBC.
Uyu muhanzi yafunzwe kuwa kabiri mu gitondo maze ashinjwa ibyaha mu buryo bw’ubucamanza.
Yafatiwe ku kirwa kitwa Long Island muri New York kizwiho kuba isango y’ibyamamare mu gihe cy’impeshyi.
Nyuma yaje kurekurwa adatanze ingwate, nk’uko umushinjacyaha muri ako gace yabitangaje.
BBC yagerageje kuvugana n’uruhande rwa Timberlake kubyo aregwa, umunyamategeko we yavuze ko yiteguye kumuburanira mu rukiko.
Timberlake yari atwaye imodoka ya BMW abapolisi babona ko atarimo kubasha kuguma mu ruhande rwe, baramukurikira, baramuhagarika.
Basanze “amaso ye yatukuye cyane” kandi “ahumeka umwuka mwinshi w’inzoga” nk’uko inyandiko imushinja ibivuga.
Inyandiko z’urukiko zivuga ko Timberlake yanze gukorerwa igipimo cy’inzoga mu mubiri.
Ikinyamakuru CBS News kivuga ko yabwiye abapolisi bamuhagaritse ati: “Nanyoye martini imwe”.
Biteganyijwe ko azitaba urukiko tariki 26 z’ukwezi gutaha kwa Nyakanga.
Timberlake w’imyaka 43 ni umwe mu bahanzi bakunzwe ku isi mu myaka ishize kandi n’ubu ugikomeje ibikorwa bya muzika.
Muri New York, uhamwe no gutwara imodoka yasinze ashobora gufungwa kugera ku mwaka umwe, ihazabu ya $1,000 (arenga miliyoni 1,3 Frw) no guhagarika uruhushya rwe rwo gutwara nibura amezi atandatu.
Timberlake ni umugabo w’umukinnyi wa filimi Jessica Biel, bafitanye abana babiri.