Arsenal yatsinze AS Monaco ibitego 3-0 naho FC Barcelone itsinda Dortmund bigoranye ibitego 3-2 mu mikino y’Umunsi wa Gatandatu wa UEFA Champions League.
Umukino wa Arsenal na AS Monaco watangiye utuje cyane, iyi kipe yo mu Bwongereza yiharira umupira, ubona ko iyo mu Bufaransa ifite amayeri yo gutangira yugarira.
Mu minota 20, Arsenal yatangiye gusatirana imbaraga zikomeye ariko rutahizamu Gabriel Jesus ntabyaze umusaruro amahirwe yabonaga.
Ku munota wa 33, Martin Ødegaard yazamukanye umupira mwiza awucomekera Gabriel Jesus wawuhinduye imbere y’izamu, usanga Bukayo Saka atsinda igitego cya mbere.
Igice cya mbere cyarangiye Arsenal yatsinze AS Monaco igitego 1-0.
Mu gice cya kabiri, The Gunners yasubiye mu kibuga yiminjiriyemo agafu. Ku munota wa 79, Saka yatsinze igitego cya kabiri.
Kai Havertz wari winjiye mu kibuga asimbuye yashyizemo agashinguracumu ku munota wa 88.
Umukino warangiye Arsenal yatsinze AS Monaco ibitego 3-0 ijya ku mwanya wa gatatu n’amanota 13.
Undi mukino wabaye wari itegerejwe cyane, ni uwo FC Barcelona yatsinzemo Dortmund bigoranye cyane ibitego 3-2.
Manchester City yatsinzwe na Juventus ibitego 2-0, ikomeza ibihe bibi irimo kuko mu mikino 10 iheruka gukina mu marushanwa yose, yatsinzemo umwe gusa wa Nottingham Forest.
AC Milan yatsinze Red Star Belgrade ibitego 2-1, Feyenoord itsinda Sparta Plague ibitego 4-2, Stuttgart yanyagiye Young Boys ibitego 5-1, mu gihe Benfica yanganyije na Bologna ubusa ku busa.
Muri ubu buryo bushya bwa Champions League, amakipe yose asigaje imikino ibiri kugira ngo amajonjora arangire.
Amakipe umunani ya mbere azabona itike ya ⅛, aho kugeza ubu ari Liverpool yamaze kuyibona ifite amanota 18 kuko ntiratsindwa cyangwa ngo inganye.
Ikurikiwe na FC Barcelone ifite 15, Arsenal ya gatatu, Bayer Leverkusen, Aston Villa, Inter de Milan, Brest na Lille ya munani, zose zinganya amanota 13.
Andi makipe 16 akurikiyeho, azakina imikino ya kamarampaka mu gihe yaba atisubiyeho mu mikino ibiri isigaye.
Muri iki cyiciro harimo amakipe y’amazina akomeye nka Real Madrid, Bayern Munich, Manchester City, Dortmund, Atlético de Madrid, Juventus na AC Milan.
Ni mu gihe ikindi cyiciro cy’amakipe 12 ya nyuma azasezererwa. Kugeza ubu, arimo Paris Saint-Germain, RB Leipzig n’ayandi.
Imikino y’Umunsi wa Karindwi izakinwa tariki ya 21 n’iya 22 Mutarama 2025.